Abayobozi umunani b'Afrika bagiranye inama n'aba G-8 mu Buyapani. Abakuru b'ibihugu umunani bikize cyane ku isi, G-8, bateraniye i Toyako mu kirwa cya Hokkaido mu Buyapani kuva kuwa mbere ku italiki ya karindwi y'ukwezi kwa karindwi, kugeza kuwa gatatu taliki ya 9 y'ukwa karindwi 2008.

Baganiriye na bagenzi babo umunani b'Afrika batumiye mu nama yabo, ari bo ba president b'Afrika y'Epfo,  Algeria, Ethiopia, Senegal, Tanzania, Nigeria, Ghana, na Komisiyo y'Afrika yunze ubumwe.

Abanyafrika binubiye ko G-8 itubahiriza amasezerano yayo yo gufasha Afrika. G-8 yemereye Afrika ko mu mwaka w'2010, imfashanyo izaba yikubye kabiri, ikagera ku madolari miliyari 50 buri mwaka.

Abakuru ba G-8 nabo babwiye bagenzi babo b'Afrika ko batagomba kunyereza amafaranga y'imfashanyo bayajyana ku makonti yabo mu mabanki yo mu mahanga.