Gutegura amatora yo mu mwaka wi 2010 ngo bisa  n’ibiriko birateba. Umugambwe CNDD wa Leonard Nyangoma wagiriza abarongoye igihugu ko batariko barategura amatora yimirije mu mwaka wi 2010, mu gihe vyari bitegekanijwe ko ayo matora atangura kuringanizwa mu kwezi kwa gatanu.

Umuvugizi w'umugambwe CNDD Francois Bizimana yabwiye abamenyeshamakuru ko ibikenewe kugira amatora yimirije agende neza. Ica mbere gikenewe kandi kitaratangura ngo n’ibiganiro kugira ingingo zimwe zimwe zo mw'ibwirizwa nshingiro zihindurwe. Umugwi wigenga ujejwe ivyerekeye ayo matora ngo nturashingwa kandi ukenewe cane.

Umuvugizi wa CNDD asigura kandi ko ivyerekeye intwaro ibereye, agateka ka zina muntu n'umutekano bidahumuriza. Umutekano ngo ntawowizigira kubera ko reta n’umugwi Palipehutu-FNL bitarumvikana k’ukungene boshira mu ngiro amasezerano bemeranije. 

Iyindi ngorane ngo ijanye n'amafaranga yo gutunganya ayo matora. Francois Bizimana avuga ko reta ishobora kugira ingorane zo kuronka amafaranga akenewe mu kurangura ico gikorwa. Amatora aherutse, yatwaye amafaranga agera ku miriyaridi mirongo ibiri na zibiri z’amarundi, ariko ibice birenga mirongo itanu kw’ijana vy'amafaranga reta ikoresha ava mu mfashanyo.