Bato riri kutonga muSouth Africa, reANC, raramba mashoko ekuti zvinhu hazvina kumira zvakanaka munyika iyi, zvichitevera kusiya basa kwemakurukota gumi nerimwe. 

Makurukota aya anoti asiya basa senzira yekuratidza kusafara kwawo nekudzingwa basa kwakaitwa VaThabo Mbeki nebato reANC.

Pamakurukota asiya basa, vanomwe vavo vanonzi varatidza kuzvipira kushanda vari pasi pemutungamiri mutsva. 

ANC yakadoma mutevedzeri wemutungamiri webato iri, VaKgalema Motlanthe, kuti vatore basa raiitwa naVaMbeki. Dare reparamende riri kutarisirwa kugadza VaMotlanthe pachigaro chemutungamiri wenyika neChina. 

Makurukota asiya basa anosanganisira mubati wehomwe, VaTrevor Manuel, mutevedzeri waVa Mbeki, Amai Phumizile Mlambo-Ngcuka, pamwe negurukota rezvematunhu, VaSydney Mufamadi, avo vange vari sachigaro wechikwata chehurumende yeSouth Africa chiri kubata nyaya yenhaurirano dzeMDC neZanu-PF.

Mutungamiri weANC, VaJacob Zuma, vaudza vanhu vemuSouth Africa kuti vagadzikane zvavo, sezvo zvoinhu zvose zviri kubatwa nenzira kwayo.

Nyanzvi munyaya dzezve matongerwo enyika dzinoti zviri kuitika muSouth Africa, zvinogona kuvhiringa nhaurirano dzeMDC neZanu-PF, idzo dziri kuramba dzichinetsa munyika. 

VaSydney Masamvu vanoongorora nyaya dzezvematongerwo enyika, uye vachishanda neInternational Crisis Group kuchamhembe kweAfrica.

VaMasamvu vaudza mutori wenhau dzeStudio7, Blessing Zulu, kuti zviri kuitika muSouth Africa zvinogona kukanganisa nhaurirano dzemuZimbabwe.

Dzimwe Nhau Kubva kuStudio7...