Mutungamiri wenyika, VaRobert Mugabe, vange vachitarisirwa kutaura kuUnited Nations General Assembly kuNew York muAmerica neChina masikati. 

Asi vachitaura nevatori venhau neChitatu muNew York, VaMugabe vakati nyaya yedare remakurukota ichapera mumazuva mashoma anotevera sezvo pangosara mapazi mana chete edare remakurukota asati agadziriswa.

Asi vamwe vane ruzivo nezvenhaurirano idzi vanoti mapazi asara anosvika matanhatu, anoti rezvemari, kuchengetedzwa kwemukati menyika, kana kuti Home Affairs, kudyidzana nedzimwe nyika, kutongwa kwematunhu, kuwanikwa kwemvura uye zvemajere. 

Mumwe mukuru muZanu-PF anoti mapazi asara mana anoti rezvemari, kuchengetedzwa kwemukati menyika, remvura uye rezvekutongwa kwematunhu.

Nyaya iyi iri kutarisirwa kuzeyiwazve svondo rinouya panodzoka VaMugabe kubva kumusangano weUnited Nations.

Mutauriri weMDC inotungamirwa naVaMorgan Tsvangirai, VaNelson Chamisa, vaudza mutori wenhau Blessing Zulu weStudio 7 kuti mashoko aVaMugabe ekuti kwasara kugoverwa mapazi mana chete handi echokwadi nekuti pane mwongo wenyaya hapasati pabatwa.

Dzimwe Nhau Kubva kuStudio7...