Bato reM-D-C inotungamirirwa naVaMorgan Tsvangirai kuSouth Africa, rinoti hurumende yeSouth Africa yava kunyima zvizvarwa zveZimbabwe hupoteri, zvichitevera kunyoreranwa kwechibvumirano chekuvaka hurumende yemubatanidzwa. 

Nhengo dzebato iri dziri muSouth Africa dzaudza Studio 7 kuti zviri kunzi vanhu vava kukwanisa kudzokera kumusha, hupenyu hwavo husingapinde munjodzi, sezvo mutungamiri weM-D-C, VaMorgan Tsvangirai, vava kuitwa mutungamiri wehurumende. 

Asi nhengo dzeM-D-C idzi dziri kuti hapana chiratidzo chekuti hurumende yemubatanidzwa iyi yati yavapo, sezvo pasati paumbwa hurumende, uye vatsigiri veM-D-C vachiri kungoshungurudzwa muZimbabwe. Tatadza kubata bazi rezvemukati menyika muSouth Africa kuti tinzwewo divi ravo. 

Munyori anoona nezvekufambiswa kwemashoko muM-D-C kuSouth Africa, VaSibanengi Dube, vaudza Jonga Kandemiiri weStudio 7 kuti vave kutorawo matanho ekuendesa bazi rezvemukati menyika remuSouth Africa kumatare  kana rikasadzora mwoyo panyaya iyi.

Dzimwe Nhau Kubva kuStudio7...