Mutungamiri wenyika, VaRobert Mugabe, vanoti vari kutarisira kuti dare remakurukota ehurumende yemubatanidzwa ringe raumbwa mukupera kwesvondo rino. 

VaMugabe vakataura mashoko aya panhandare yendege muHarare  neMuvhuro vachibva kumusangano weUnited Nations General Assembly.

VaMugabe vanoti pane mapazi emakurukota mana chete asara ekuti vawirirane naVaTsvangirai. Mapazi aya anoti rezvemari, kuchengetedzwa kwemukati menyika, matunhu uye kudyidzana nedzimwe nyika. 

Vakuru muZanu-PF neMDC vane ruzivo nezviri kuitika, vanoti papihwa chikumbiro chekuti MDC itore bazi rezvemari nekuchengetedzwa kwemukati menyika, ukuwo Zanu-PF yotora bazi rekudyidzana kwedzimwe nyika nerematunhu.

Munyori mukuru muMDC inotungamirwa naVaArthur Mutambara, VaWelshman Ncube, vanoti musangano wekugadzirisa nyaya yedare remakurukota uye kugadza hurumende yemubatanidzwa, ungangoitwa neChipiri.

Asi munyori mukuru muMDC inotungamirwa naVaTsvangirai, VaTendai Biti, vati havana ruzivo nezvechibvumirano ichi, kanawo musangano weChipiri. 

VaCharles Mangongera vanoongorora nyaya dzezvematongerwo enyika. VaMangongera vaudza mutori wenhau Blessing Zulu weStudio7 kuti nyaya yedare remakurukota pamwe nekugadzwa kwehurumende yemubatanidzwa, inofanira kugadziriswa sezvo nyika yoramba ichienda kumawere.

Dzimwe Nhau Kubva kuStudio7...