Nyaya yekupedza gakava pakati peZanu-PF neMDC panyaya yedare remakurukota inenge yokora muto, sezvo VaMugabe nevamwe vavo, vari kuramba kududza panyaya yekugoverana mapazi ehurumende zvakafanira. 

Asi vamwe vakuru muZanu-PF vanoti vari kutarisira kuti vari kutungamira mapato munhaurirano idzi, vataurirane kutanga neMugovera. 

Asi munyori muMDC inotungamirwa naVaMorgan Tsvangirai, VaTendai Biti, vanoti havana ruzivo nezvemusangano weMugovera, nekuti havana kunge vasumwa. 

Asi zvinonzi Zanu-PF yave kungoti vakasangana pangataurwe chete nyaya yegurukota rezvemari, kwete rematunhu, kudyidzana nedzimwe nyika kana kuchengetedzwa kwemukati menyika. 

Vamwe vakuru mubato iri vanoti zvekuchengetedzwa kwemukati menyika hazvingataurwe nezvazvo, sezvo chiri chigaro chinopihwa munhu akanga ari kuZapu, bato iri risati rabanata neZanu-PF. MDC inoti inoda kuti VaMbeki vapindire sezvo VaTsvangirai vasiri kuwirirana naVaMugabe panyaya yemapazi iyi. 

Asi Zanu-PF iri kuti hazvina kukodzera kuti VaMbeki vauye kuzoyananisa. Mashoko ari kubva kuSouth Africa anoti VaMbeki vabvuma kuenderera mberi nekuva mutongi gava, uye vangangotumidzira nhumwa yavo kuti inosangana nevari munhaurirano idzi mukupera kwesvondo. 

Asi mutariri waVaMbeki, VaMukone Ratshitanga, vaudza vatori venhau muSouth Africa kuti havana ruzivo nezverwendo rwenhumwa yaVaMbeki.

Professor John Makumbe inyanzvi munyaya dzezvematongerwo enyika, uye vachidzidzisa paUniversity of Zimbabwe.

Professor Makumbe vaudza Blessing Zulu weStudio7 kuti VaMugabe havana hany'a nekuti vanhu vari kunonga svosve nemuromo.

Dzimwe Nhau Kubva kuStudio7...