Sangano revarairidzi reP-T-U-Z rinoti riri kushushikana zvikuru nekutadza kubudirira kwekunyorwa kwebvunzo dzekupera kwegore dzeGrade 7. Sangano iri rinoti rinorwadzikana zvikuru nekukundikana kweZIMSEC nebazi redzidzo kutambira pfungwa yekuti bvunzo dzose dzegore rino dzisendekwe sezvo vana, vadzidzi pamwe nebazi redzidzo, vasina kugadzirira zvakakwana. 

Bvunzo dzeGrade 7 dzaifanirwa kutanga kunyorwa neMuvhuro svondo rino, asi hadzina kubudirira mushure mekunge ZIMSEC yatadza kutumira magwaro anoratidza nguva inofanirwa kunyorwa bvunzo pamwe nemibvunzo kuzvikoro. NeMuvhuro P-T-U-Z yakasangana nemunyori mukuru mubazi redzidzo, VaStephen Mahere, vachida kuti bvunzo dzisanyorwa gore rino. 

Asi mumwe mushandi mubazi redzidzo anoti vachiri kuongorora zvakabva kusangano revarairidzi iri. Bazi redzidzo raudzawo bepanhau reHerald kuti rakagadzirira chose uye bvunzo dzichanyorwa kana rangopedza kugadzirisa hurongwa hwariri kuita. 

Mutungamiri wePTUZ, VaTakavafira Zhou, vaudza Jonga Kandemiiri weStudio 7 kuti hurumende yava kungonyara kubuda pachena kuti yakundikana munyaya dzedzidzo.

Dzimwe Nhau Kubva kuStudio7...